الحمدلله على نعمة الأمن و الأمان .. اللهم لك الحمد كما ينبغي لجلال وجهك وعظيم سلطانك
موضوعي اليوم ( مقشر القهوة ) يستخدم للجسم فقط لأنه حار على الوجه …
مقشر القهوة
طريقة الإستخدام :
بعد غسل الجسم بالماء و الصابون او الشاور جل يتم وضع مقشر القهوة على الجسم بحركات دائرية لمدة 12 الى 15 دقيقة تقريبا .
ثم يشطف الجسم بالماء لإزالة جميع آثار مقشر القهوة ثم يغسل الجسم بالصابون او الشاور جل فقط … عدد مرات الإستخدام على الأقل مرة واحدة في الأسبوع و ممكن أكثر ( من المهم الإنتباه من الإنزلاق لأن المقشر يحتوي على زيوت )
نعيـــــما مقدما .. إستودعتكم الله الذي لاتضيع ودائعه
اليوم الطبق مالح تقدروا تعتبروه طبق كيتو او طبق قليل الكاربوهيدرات حتى الملح خفيف .
هذه المرة غيرت نزلت المكونات والطريقة في صورة اتمنى تعجبكم و يارب يعجبكم الطعم على فكرة اذا تبغوه سبايسي حار ضيفوا له فلفل بودرة انا ماضفت لأن ما احب الأكل السبايسي كثير بالنسبة لصلصة الطماطم استخدمت ( صلصة كي دي دي بدون ملح ) .
الكاربوهيدرات كذا نسبتها في السعرات لأن حاسبة كل شي حتى البهارات .
من فترة صارت عندي مشكلة الله لا يجيب مشاكل .. المشكلة كانت اني طول الوقت ابغى أكل يعني لو فمي ما اتحرك احس في شي ناقص مع اني كنت أعمل رياضة حسيت ان تعبي راح يروح على الفاضي 🥺
المهم ابشركم لقيت لها حل الحمدلله 😏
الصيام .. بالضبط الصيام كان الحل لهذه المشكلة ماتعرفوا قد ايش ضبطت الشهية للأكل بسبب الصيام الحمدلله و على فكرة في اول يومين نقصت ماشاء الله 1.9 كيلو ✌🏽 طبعا اكيد من السوائل المحبوسة آخر فترة بس ما يهمني الوزن الي يهمني اني اتحكمت في المشكلة ورجعت اكل بشكل صحيح و اركز في نوعية الأكل ( بالنسبة للبنات ممنوع الصيام اكثر من ١٤ ساعة كلامي هنا على الصيام المتقطع لأنه يختلف عن الصيام الاسلامي )
بالنسبة لي كان صعب علي أبدأ اصوم ايام العمل لأن عملي قبل المغرب يعني فرصتي أعمل الرياضة في النهار كذا كيف راح اصوم 😢 لقيت لي حل .. طبعا بما إن اجازتي يوم الجمعة فقط قررت اصوم جمعة و سبت كيف ؟
اصوم صيام عادي من الفجر الى المغرب ( فترة مؤقتة بعد كذا راح احسب الساعات بحيث لاتتجاوز ال ١٤ ساعة ) بعد مغرب الجمعة اشرب ماء و أعمل رياضة لان أحب أعمل رياضة على معدة فاضية وأكون نشيطة ماشاء الله 👍🏽
يوم السبت عندي دوام يصير يوم راحة من الرياضة و اصوم من الفجر و افطر المغرب في الدوام هذه الطريقة جدا فادتني وريحتني ( طبعا إذا صمت صيام اسلامي يوم الجمعة لازم اصوم السبت معاه او الخميس بالنسبة لي الانسب اصوم معاه يوم السبت )
وهذه افضل النقاط الي فادتني في التحكم في الشهية للطعام 👇🏽
اقبال فلاته 