السلام عليكم ورحمة الله وبركاته…
كيفكم ان شاء الله تمام؟
على فكرة برنامج اليوغا الي كنت بادئة فيه من فترة وقفته لسى يحتاج لي وقت لكن رجعت لبرنامج الثمانية اسابيع ووقفت عند الاسبوع الرابع خلصته واللاب توب خرب شاحنه و البرنامج لازم يتحمل تورنت يعني في الجوال ماراح القاه 😞
مو مشكلة مين قال وقفت 😏 لا طبعا
الآن لقيت برنامج ثاني وبدأت فيه اليوم ثاني يوم هو خمس ايام في الاسبوع للان الاسبوع الأول بدون اوزان ماشفت الأسابيع الباقية 😁
ماعلينا ندخل في الموضوع.. اليوم جهزت كمية بطاطا حلوة في الفرن وسلطة خضراء بالروبيان 😋
البطاطا الحلوة غسلتها وقشرتها.. بعدين قطعتها قطع كبيرة ( عملت كمية لليوم ويومين زيادة ) تبلتها بشوية ملح وقسمتها جزئين جزء اضفت له بودرة بصل
والجزء الثاني بابريكا
في صينية حطيت عليها ورق زبدة و بعدها البطاطا اخر شيء رشة ببخاخ الزيت.
ندخل الصينية في فرن مفتوح مسبقا ( افتح فقط النار في الجزءالاعلى من الفرن ) لمدة ٢٥ دقيقة او حسب درجة الفرن الخاص بكم بالنسبة لي ٢٥ دقيقة اعطتني النتيجة هذه 😋
اما السلطة :
٣ حبات خيار 🥒 + حبة واحدة جزر 🥕 + حبة 🍅
ابشر الخيار والجزر واقطع الطماطم مكعبات بالنسبة للروبيان سلقته بدون شي ولا حتى ماء لان راح يطلع منه ماء كثير تقريبا مدة السلق ٣ دقائق مكتوب في الكيس.
طبعا بدون اضافة ملح الا عند التقديم ضروري وبما اني ابغى اخذها للعمل اخذت معي ملح في كيس صغير
وانتهينا 🎉
وعافيه على قلوبكم يارب 🌷
اقبال فلاته 